Euskal Eskola Publikoaren 26. Jaiaren egitarauaren aurkezpena

Lurdes Imaz, EHIGEko koordinatzaileak, Lurdes Errasti, Arabako Denon Eskola federazioko presidenteak eta Gasteizko ikastetxe publikoetako ordezkariek prentsaurrean aurkeztu dituzte gaur igande honetan, ekainak 4, Gasteizen ospatuko den Euskal Eskola Publikoaren 26. Jaiaren egitaraua eta azken xehetasunak.

HASIERA-EKITALDIA.

Goizeko 11etan ospatuko da Reina Sofia hiribidetik Bastida plazarako sarbidean. Bertan parte hartuko dute Cristina Uriarte Esko Jaurlaritzako Hezkuntza sailburuak, Ramiro González Diputatu Nagusiak eta Gorka Urtaran alkateak, antolatzaileekin batera.

Ondoren, Zabalganako ikastetxe publikoetako ordezkariek lekukoa emango diete datorren urtean Euskal Eskola Publikoaren Jaia antolatuko duen ikastetxeei.

HELBURUAK

Euskal Eskola Publikoa hezkuntza-sistemaren oinarrizko ardatz egituratzailea izan behar dela jai giroan aldarrikatzea da 1994tik guraso elkarteok antolatzen dugun Euskal Eskola Publikoaren Jaiaren helburu nagusia.

Helburu nagusi horretaz gain, eskola publikoak duen zeregina azpimarratu nahi dugu aurten gizarte kohesionatua eta integratua lortzeko. Publikotasunetik soilik lortu daiteke hezkuntza sistema inklusibo eta ekitatiboa. Zabalganako ikastetxe publikoak horren adibide ona dira, aniztasuna aprobetxatuz eskola euskaldun, publiko, inklusibo eta anitza lortu dutelako.

LELOA ETA IRUDIA

“Josi ta josi” da Euskal Eskola Publikoaren 26. Jaiaren leloa. Lelo honen bidez hauxe transmititu nahi dugu: aniztasunak eskaintzen duen aberastasunetik abiatuta, Euskal Eskola Publikoak elkarbizitzan oinarritutako gizarte kohesionatua eraikitzen duela, eta errespetuaren eta tolerantziaren baloreetan hezten dituela etorkizuneko belaunaldiak.

Irudiak ideia hau erakusten du, kolore desberdinetako piezak gainjarriz, oinarrizko irudi horien aberastasuna eta aniztasuna barne hartzen duten pieza berriak sortuz. Ibon Saenz de Olazagoitia diseinatzaile gasteiztarrak sortu du irudia.

19.000 IKASLETIK GORA GASTEIZKO IKASTETXE PUBLIKOETAN

Gasteizko ikasleen gehiengoa ikastetxe publikoetan dago eskolarizatua (40 ikastetxe, 19.000 ikasletik gora). Hauetatik lau Zabalgana auzoan daude eta 1390 ikasle dituzte guztira: Mariturri, Zabalgana eta Aldaialde lehen hezkuntzako ikastetxeak eta Zabalgana institutoa.

This entry was posted in Aurkezpena, Egitaraua and tagged , . Bookmark the permalink.